Read More!!!

Categories


22Nov

Flight Experience Kuwait

 

من هواياتي حب الطيران و الطيارات واي شي بالهوا يرفرف و كان عندي فاةشر من صديق عزيز لـ تجربة Flight Experience Kuwait الموجود في مجمع 360 ..

المكان مو كبير بس يفي بالغرض فيه مكان لـ شرح خطه الطيران و شنو الي راح يصير بالضبط, اول شي يخلونك تشوف فيديو تعريفي عن المكان وعن الطيران معاهم بشكل عام و بعدها ايي الموظف او مساعد الطيار الي راح يكون معاك بالرحله يشرحلك بالتفصيل الممل شراح يصير وياك.. تقول جن صج راح نطير ..

بعد الفيديو تختار شنو نوع الرحله؟ هل تبي تطير و تهبط تطير و تهبط  في كذا مطار علشان تتعلم على الاقلاع و الهبوط  ولا تبي رحله من مدينه لي مدينه؟  ولا تبي تطير من مطار و تفتر في مكانك و تطب بمطارك مره ثانيه؟ .. انا عن نفسي حبيت اجرب الرحله و اختر الطيران من فيغاس الى كاليفورنيا ..

تالي دشينا كبينة الطياره و الوضع عجيب تقول كبينة طياره صجيه من جميع النواحي .. من الكرسي الى اصغر دقمه .. الي خلاني اكيف على الاخر في الكبينه صوت السماعه و المايك .. ضبط ريت يايبينه بصوت المكاين والجو و كل شي 🙂 ..

معظم الوقت طار على الـ Check List  سواء بالاقلاع او بالهبوط و طلع لكل “سويج “و “دقمه” في الكبينه لها معنى و ماكو شي للديكور 🙂 بس حلو عرفنا تقريبا نص “الدقم” شنو تسوي ..

بعد الـ Check List تجهزنا للاقلاع وطبعا مساعد الطيار الي معاك خليك تسوي كل شي من طق طق لي سلام عليكم.. ومن تطير يعلمك شلون توازن الطياره و شلون تعدل الضغط و شلون تختار مسارك .. مو على ابو ان طاير بالسما ومافيها شوارع تطير علي كيفك لا يبه ,, في نقاط لازم تمر عليها و يسمونها تقاطعات حالها حال تقاطعات الشوارع..

وبعد ما تضبط خط السير و توصل الارتفاع المطلوب تعطيه Auto Pilot بو ربع ساعه وخلال الربع ساعه يعلمك على “السويجات” و “الدقم” الباقيه.. و ما يمدي تخلص الربع ساعه الا انت محتاج انك تجهز حق الهبوط ..

ونفس اللويه في الاقلاع اذا مو ازيد تسويها علشان تهبط .. تعدل الضغط و تدرج بالهبوط و تعدل على السرعه و لازم تشوف الهوا الخ الخ الخ… شي رهيب و وناسه على الاخر..

و من تهبط بشوي تخلص رحلتك .. ما تحس بالساعه من كثر الوناسه و الاندماج.. من ناحيتي ان شاء الله رايحه مره ثانيه و ثالثه ..

عندهم بعد خوش محل للهدايا , حق الي يحب السوالف التذكاريه راح يستانس عليه ..

بالنسبه للاسعار .. الاسعار مرتفعه بس مو غاليه لان السالفه تسوى:

رحلة 30 دقيقة: 39.00KD
رحلة 45 دقيقة: 45.00KD
رحلة 60 دقيقة: 55.00KD
أفضل تجربة رحلة 90 دقيقة: 75.00KD

للاتصال بـ Flight Experience Kuwait

الدائرالسادس– ضاحية الزهراء
مول 360 الطابق الثالث
الهاتف : ‎+965 2530 9690‎
الفاكس : ‎+965 2530 96 91‎
البريدالإلكتروني : kuwait@flightexperience.com
لزيارة الموقع الالكتروني: flightexperience.com


Leave a Reply

Recent Posts

My Bucket List

Jacob’s Well, Texas – Fringe Festival, Edinburgh - Holi, India -