Read More!!!

Categories


8Feb

Chief boutique, Japanese Cuisine

من قال الكويت مافيها شي نسويه .. والله فيها بس عليك تدور صح 🙂 .. قبل اسبوعين واحد من الربع مدحلي “شيف بوتيك” و قالي ان حده وناسه و المكان كلاس و الستاف ممتازين و بما اني احب الاكل بشكل عام و الياباني بشكل خاص نصحني اروح حصه الطبخ الياباني .. و ما صدقت خبر وعن طريق التلفون حجزت وكلها دقايق و دزولي ايميل تاكيد الحجز و بالنسبه للدفع ادزون لك السايق وين ما تبي و تدفعله .. يعني شغل مربت من البدايه..

المطبخ في بيت في حطين، البيت راهي وعلى الشارع يعني ما يضيع و المكان حده زقرت .. جاهز من كل شي .. صج ترتاح نفسيا من الترتيب و التجهيز إلي على اصوله.

الشيف اعتقد كان فلبيني بس شيف اصلي .. يعلمك خطوه بخطوه .. واسلوبه بسيط و يتماشى مع الكل من الطباخ المجابيس الى طباخ البيض و الطمام .. وفوق هذا كل شوي يايك احد من مساعدينه يقولك تبي شي، متوهق بشي، عفست شي .. يعني ما يخلونك هدد 🙂

بلشنا على الساعه ٥ ونص و ما خلصنا الا على الـ ٩ بليل تقريبا و ما كان ودي نخلص اصلا..

بلشنا بالسلطه وطبعا ماكو اسهل منها و بعدها سوينا التمبورا – قشرنا الربيان  و نظفناه و بعدين فقصناه و غسلناه وغطيناه بالزبده و تالي بالطحين واخر شي قليناه .. وطبعا ليش انا مسويه كان حده لذيذ.. وبعد التمبورا سوينا الماكي رول بس حسافه ما حطينا بيض السمج .. الماكي كان نظريا سهل بس عمليا حده صعب..

وبعدها سوو الحضور السلمون – انا ما سويت لان ما احب السلمون – و بعد السلمون سوينا الحلو .. اقوى شي الحلو .. برد مقلي مع الكورن فليكس والعسل .. اف اف شنو كان لذيذ .. بروحه يسوى سعر التسجيل كله .. اقوى برد و احلى حلو ..

طبعا كل ما تسوي شي تاكله يعني اطبخ و اكل فرش بفرش 🙂 ..

التجربه كانت ١٠/١٠ و المكان كانت ١٠/١٠ والادوات و المعدات همن كانت ١٠/١٠ الستاف ١٠/١٠ .. وان شاء الله رادلهم مره ثانيه ..

اذا بتعرفون شنو جدولهم او تسجلون او تعرفون شنو نظامهم ما عليكم الا زيارة موقعهم: http://chefboutique.com.kw

Leave a Reply

Recent Posts

My Bucket List

Jacob’s Well, Texas – Fringe Festival, Edinburgh - Holi, India -