Read More!!!

june, 2017

No Events

july

No Events

Categories


26Nov

رحلة تايلند اليوم السادس: سباق سيارات ، ترمي ، بانجي

بعد جم يوم من الرحلات، الكل تعبان و دايخ فكبرنا المخده اليوم و نمنا لي الساعه ١١ الضحى.

ويوم قعدنا رحنى تغدينا بقهوه دبي كالعاده و بعدها أجرنا تُوكتُوكين و قزو فينا بوكيت من بحرها لي مدينتها وحدها ضبطتنا صاحبت التُكتُك..

أول شي رحنى حلبت سباق سيارات Go Kart اول ما وصلنا عطونا انواع السيارات و سرعاتهم و اسعار تأجيرهم .. يعني اذا خذيت سياره cc نازل، سرعتها ماراح تكون ذاك الزود و تأجيرها راح يكون رخيص و كل ما زاد الـ cc زادت السرعه و فلوس التأجير بس بالنسبه لنا ما فرق سعر التأجير و كلنا كنا بنأخذ اسرع شي .. بس جان يقول الريال أي شي يخترب بالسياره راح ندفع فلوسه.. يعني تدعم شي و لا تدش بصاحبك ولا تسحك رصيف كله محسوب جان نهون عن السيارات السريعه و خذينا الي اقل منهم بدرجه يعني مسوين شي 🙂 و سعر التآجير بـ ١٢٠٠ بات.

انا مو من عشاق السباقات و السيارات بس حدي حدي استانست و الكل مكيف لان الجو عجيب و الحلبه عجيبه و التنافس بالسباق بينا بس كان معطي السباق شي حلو..

ويوم خلصنا رحنا مضمار الرمايه .. وكان ودي ارمي بمسدس.. المهم رحنى و كان تقريبا كل شي موجود من فُرود بس الشوازن و الرشاشات ماعندهم زود و ما يبردون الجبد..

بس وناسه الترمي و الطلقات و الصوت و الفُرود شي شي .. ما ينلامون الناس لما تبي تسوي عصابات p( .. و كان معدل سعر الـ ١٠ طلقات بـ ٩٠٠ بات الى ١٠٠٠ بات حسب نوع السلاح.

ويوم خلصنا ركبنا التكتك و اتجهنا الى البنجي جمب ويوم وصلنا المكان روعه كله زرع و بحيره و كوخ صغيرون و شي على اصوله بس تكرمون الي يشتغل هناك **** واحد شايف نفسه و يتكلم من طرف خشمه و شافنا عرب وبغى يتفلسف علينا جان اتهاوش معاه ومشينا و رحنى مكان ثاني ..

المكان الثاني ما كان بروعة الاول 🙁 بس يأدي الغرض و من اصل ٧ اشخاص نط ٤ … و بهالنطه عبينا ادرينالين صح 🙂 حسافه باجي الربع مانطوا 🙁 .. كلفتنا النطه ١٠٠٠ بات تقريبا.

يوم خلصنا قلنا نبي نرمي اطباق و نبي شوازن .. كويتيين مامنا فايده 🙂 .. جان يودونا بالتكتك مكان ثاني بس شوي بعيد بس خيالي .. ما شاء الله الطبيعه عندهم فيها طفوح مو طبيعي ..

وصلنا و رمينا و طلعت انا و اخوي النقوشيين فيهم 🙂 .. و بعدها ردينا فندقنا .. ريحنا و غسلنا و طلعنا نتمشي و ما يحلى التمشي من غير ما تاكل مانغا و اناناس  و بعد التمشي حجزنا رحلة باجر و ختمناها بقهوه دبي مثل كل يوم 🙂 .. و تصبحون على خير ..

One Response to “رحلة تايلند اليوم السادس: سباق سيارات ، ترمي ، بانجي”

Leave a Reply

Recent Posts

My Bucket List

Jacob’s Well, Texas – Fringe Festival, Edinburgh - Holi, India -
X