Read More!!!

Categories


25Aug

الخيران في رمضان

الاسبوع الي فات كنت حاجز الخيران و كانت اول مره احجز فيها هناك والكل كان يقولي ماعندك سالفة اكو احد يروح الشاليهات برمضان ..  عاد انا توقعت كانوا يقولون لي جذي علشان التعب والصيام ..

المهم, رحت الخيران ولا الاخوان مغيرين و مجددين مكتب الاستقبال قلت زين عدلوه وان شاء الله مجددين شغلات داخل .. و بعد التسجيل دشينا الخيران و لا فاااااضي ماكو الا انا و جم شاليه ينعدون على الاصابع .. ماكو لا خمه و لا شلايتيه.

وبعدها دشيت الشاليه (استديو) ولا الله لا يواريك 🙁 ريحة زفر مو طبيعيه و الاستديو حده حده اي كلام .. تقول فندق نجمتين.. رديت مكتب الاستقبال و قلت لهم بغير الشاليه و وروني استديو ثاني و طلع نفس الشي فقلت خلاص نقزها بخور كلها يومين.

                    

ما صار الليل ولا زوجتي تصارخ زهيييييوي 🙂 قلت لها صقعيه بالنعال .. شوي لا اخو الزهيوي طالع و شوي ولا ثالث طلع معاه (شهالمكان الوصخ) فدقيت على الاستقبال و قلت لهم ودزولي ملوت التنظيف و نضفوا و رشوا مادري شنو حق الزهيويه.. طبعا بعد ما شفنى الزهيويه ماجسنا مطبخهم الفاشل.

قلنا خل نطع نغير جو و نروح صالة الالعاب هههههه صالة الالعاب والله فشله منتزه و هذي صالة الالعاب مالته, مالي داعي اكمل.. وبعدها رحنى لعبنا اليهال بالدوارف الي يم الصالة و الحمدالله اول شي يستانسون عليه وعقب الدوارف ركبنا الحنطور و من هالوقت بدء اليوم يتحسن 🙂

رحنا الحديقة و كانت فاضيه و الطلبات توصل بسرعه و مال الفحم مجابلك ومتوصي فيك والجو حده قوي حده حده, كانت خوش قعده.

اليوم الي بعده قعدنا على الساعه 2 الظهر و من الفراش لي البحر ويا حلات البحر من غير جت سكي و لا طراريد تعفس عليك المايه .. ومحد قاعد يسبح الا انا و اليهال.. يعني على كيف كيفك وماطلعنا الا قبل الاذان لي المطعم.. و بعد الفطور نفس النظام صالة الالعاب هههه و بعدها الدوارف و تالي نختمها بالحديقه.. و اليوم الثالث و الاخير كوبي لليوم الي قبله.

ارد و اقول حق الشباب الي قالولي ماعندي سالفه اروح الخيران برمضان .. اقولهم انتوا الي ما تعرفون الصراحه .. اول مره اروح الخيران واستمتع بوقتي .. لان كل ماراحت الخيران زيارة يا زحمه و لويه و مصخره يا حر و رطوبه بس هالمره الخيران فاضي و الجو شي مو طبيعي.

Leave a Reply

Recent Posts

My Bucket List

Jacob’s Well, Texas – Fringe Festival, Edinburgh - Holi, India -