Read More!!!

Categories


8May

الكفالة و خدمات ما بعد البيع في الكويت

135من الشغلات الي حبيتها بأمريكا كانت خدمة العملاء و خدمات ما بعد البيع ، من كفاله وغيرها من امور تحصل ..

اما في الكويت فالنقيض تماماً و تقريبا في كل الشركات .. لا من شركات اتصالات ولا من بنوك و لا من شركات استهلاكية ..

الاسبوع الي فات صارلي موقفين مع شركتين في قطاعين مختلفين ..اكس سايت و التسهيلات ..

كنت شاري iPhone منهم و بعد اقل من شهر اختربت الكاميرا و لما دقيت اسال عن الكفاله قالولي كفالتك عند شركة النهار.. منو شركة النهار هذي؟! بس امري لله رحت لهم و قبل ما يستلمون الجهاز قالوا وين الفاتوره الاصلية (او كوبي اصلي اطبعه من اكس سايت) مع ان الجهاز مسجل عندهم مع بيانات البيع من اكس سايت واضحه .. بس لسبب الروتين الغبي يبون الفاتوره ..

ثاني شي اصدموني فيه انهم تفحصوا الجهاز من الخارج لاي خدوش او علامات .. ولما شافت موظفة الاستقبال الفذه زلق قالت : بسبب الـ “الطيحه دي” راح تسقط الكفالة ، ومن صجها تتكلم .. اي طيحه الي تتكلمين عنها !! و شدراج انها طيحه؟ و من قال انه طايح من اساسه؟

و بعد نقاش طويل بين صراخ و غيره ، اتصل مدير الدعم الفني الي كان يشوف نقاشنا من الكاميرا الموجود عند مكتب الاستقبال و قال معاك حق و راح نستلم التلفون و نصلحه على الكفالة ..

الحين ليش كل هذي اللوية علشان التصليح على الكفالة؟ ليش النصب و اللعب على الزبون في خدمات ما بعد البيع؟ يعني لو مو لساني طويل و كنت شكاي جان ماخذوا التلفون..

دور حماية المستهلك لازم يكون فعال في هذي النقاط و لازم يكون متواجد في مثل هالمواقف .. و بالنهاية ما اقول الا الله يعين المستهلك الكويتي.

تويتر ادارة حمالة المستهلك cpd_kw .. تويتر mstahlekq8

Leave a Reply

Recent Posts

My Bucket List

Jacob’s Well, Texas – Fringe Festival, Edinburgh - Holi, India -