Read More!!!

july, 2017

No Events

august

No Events

Categories


7Apr

I’m back with Qatar feedback

IMG_2125

الطريج و السفر بالسياره حلو .. بس العرب دايما يحطون العراقيل في كل شي و لا يحاولون يبتكرون طرق لعمل مثالي . الطريج الي قطر مفروض يكون ٨ ساعات من البيت لي الفندق .. الا ان الحدود و غيرها ممكن تعطلك درل الوقت.

يوم الثلاثة ٢٤ فبراير و يوم الاربعه و الخميس عطله ، طلعت من الدوام الساعه ثلاث ونص رجعت البيت و زهبت و طلعنا على الخمس و نص .. تقريبا بعد ساعه وصلنا حدود الكويت كانت مثاليه كل الشبابيك مبطلع ومافي زحمه تذكر ما طولنا اكثر من عشر دقايق .. الا ان الوضع في السعوديه كان مزري على الاخر ،، الزحمه وصلت المنطقه المنزوعه يعني اكثرمن ٣ كلم زحمه .. كان واضح ان حدود الخفجي مو متزهبين ليوم عطله ، الوضع كان سخيف جدا – حزاها تذكرت طريجنا من كلون الى هولندا شجاب لي جاب الطريج و شجاب لي جاب الحدود بين الدولتين – عموما خذت الجوازات من وقتنا ٣ ساعات و للاسف جوازات السعودية ما كانوا يدخلون بيانات كل الركاب ، كانوا بس يدخلون واحد و الباجي طاف علشان اذا يه يطلع من السعودية الى الامارات او قطر او البحرين لازم يروح يحدث بيانات المسافرين دخول علشان يقدر يطلع.

بعد الحدود التعسفية كان الطريج سهاله ، مو ذاك الزحمه و بعد ٧ ساعات وصلنا سلوى والحمدلله الحدود فاضيه ، ماكو الا احنى و سيارتين و مع هذا طولنا نص ساعه علشان حركة تحديث البيانات .. بعدها دخلنا حدود قطر و لا اتفاجأ نفس الحركه .. يقولون لي انت مسجل عندنا انك بقطر من ٢٠٠٤ 🙂 .. قلت بقلبي “كفو” طلعت تسجيل حركة الدخول و الخروج متفشية بين دولة الخليج … عيل مادي شله جمارك و جوازات الحدود بينا.

سكنت في Wyndham Grand Regency Doha .. الفندق مترهل بعض الشي و الغرف صغار مقارنة بالصور الي شفتها وقت الحجز الا ان موقعه زين اذا عندك سيارة . و عموما قطر مو كبيرة الي تحتاج الى مشاوير بعيدة .. ما اعتقد اذا رحت مره ثانية اني اسكن في هالفندق لان الفنادق الي يم سوق واقف وايد اجدد و افضل.

شنو ممكن تسوي في قطر؟؟  او وين ممكن تروح ؟؟  للاسف الصوره الي خذيتها عن قطر تختلف عن الي شفتها .. فالامكان محدوده جدا و مدة الاقامه فيها مفروض ما تتعدا الويك اند ..

امكان مثل فيلاجيو و سيتي سنتر كانت اشبه بماجيك بلانت و المثنى .. كلش ما كانهم يدد .. مجمعات الخُبر وايد احلى و احسن وشكلهم اجدد ، اما الاكل و المطاعم فحدث بلا حرج  ، ما اذكر اني خلال الـ اربع ايام كليت بمطعم و صج تلذذت فيه.

اما الاماكن السياحية فكانت افضل من مجمعاتهم و كان افضلها سوق واقف .. شي عجيب و مكان ما تمل منه  يستاهل اكثر من زيارة و يوم واحد ما يكفيه ، البنيان و المحلات و الجو العام شي قوي ، القهاوية و المطاعم غالية بعض الشيء بس على الاقل مكان ممتع على عكس المجمعات .. سوق واقف كان افضل ما بالسفره.

من الامكان الي صج استمتعنا فيها كانت حديقة متحف الاثار الاسلامية ، حديقة جميلة و تشرح الصدر و فيها مطعم يطل على البحر و بنايات الدوحه و فيها تأجير قواري ، قضينا ما بين حديقة المتحف و المتحف فوق النص نهار ، مكان عجيب وبسيط ماهو زحمة ..

اما بالنسبه للمتحف ، كان ممتاز ، لكن للاسف الدور الرابع كان مسكر للتجديد بس الادوار الثلاثه الاولى كانت وافية بالتحف و المعروضات ، تحف من شكل  ، انا و العايلة استمتعنا فيها .. وبالمتحف في قهوه و مطعم بالدور الارضي تطلع على البحر عادي تقعد فيها وما تحس بالوقت .. مكان شرح و راقي و هدوء..

كاتارا تحفه معمارية و شاطئ رهيب و جم مطعم ، المكان نهاري اكثر من ماهو ليلي علشان تتمتعون بالجو و المنظر من المطاعم .. اتوقع ليلحين ما خلص المكان لان كان في تكسيرات و ترميم .. المكان حلو بس يفتقر النشاطات الي تقدر تسويها فيه ..

جزيرة اللؤلؤه .. ما اعتقد انها خالصه بس على وضعها الحالي كانت مكان عادي ، محلات ماركات و عدد قليل من المطاعم و القهاوي على المرينا و لمدخنين السيغار تلقون فيها Casa del Habano الا ان صغير و قعدته ما تطل على المرينا ، مكان حلو بس مبين تقليد لـ مرينا دبي ..

بشكل عام ، كانت سفرتي للدوحة دون مستوى التوقع ، الديرة كانت كثيرة الحفريات و قليلة التميز فيما عدا سوق واقف و المتحف و غير ذلك كان بمستوى الخبر و احيانا دون ذلك .. حتى اليهال ما عجبتهم و قالوا البحرين و عمان كانت افضل وايد .. فيها اماكن جديده لكن متراهله بشكل غريب  ..

One Response to “I’m back with Qatar feedback”

  1. Nawaf AL-Rudaini says:

    I told you so 🙂

Leave a Reply

My Bucket List

Jacob’s Well, Texas – Fringe Festival, Edinburgh - Holi, India -
X